Dapò el 1000 Venesia £a xe deventà anka na granda potensa nava£e in te'l Mediteraneo e £a se ga stabilìa senpre de pì kofà intermediatrice tra Oriente e Ocidente. Ko £a konkuista de Kostantinopo£i in te'l 1204 £a xe deventà £a potensa dominante del Levante. El sistema republican del so govarno xvi£upà in te na cità-stato ga servìo anka par torse na poxithion de supremazhia in te £a penixo£a taliana. Kol skominsiare del 15ximo seko£o Venesia £a se ga tolto anka on bel toko de teraferma, anka se i so interesi i stava da nantra parte. Kome ke se ga xvi£upà £e grande monarkie moderne £a po£itega internathiona£e se ga trasformà, e kosita se ga xmorsà i stati medioeva£i. Partanto ke i Otomani i strukava da Oriente e i Spanhò£i (e pì vanti l'Austria) da Ocidente, Venesia £a xe sta bòna a sopravivare grathie a £e so doti dipolomàtege, adatando el so komèrco a £e nóve kondithiuni kreà da£e róte oçeanike e dal xvi£upo de l'industria, e in sta maniera £a ga mantenhù el so benesere. £a storia de Venesia £a xe pì mediteranea ke taliana. £a se ga senpre inpego£à su pai i balkani, l'area del Danubio, el Levante, e ko el mondo Ixlamiko, tanto koanto el sakro Romano Inpero, £a Cexa, £e repiovege marinare del Tireno e £e potense ocidenta£i.